長實(1113)昨天宣佈，向李嘉誠基金會收購基建資產，作價170億，會發3.33億股新股支付，每股為51元，該基建資產將保證向長實在今明兩個年度，每年派不少於9.1億元的股息；公司同時亦宣佈，以每股51元向其他股東作回購要約，最多回購3.33億股，如要約完成時，回購股份未達3.33億股，餘數會在市場上作回購，而價格不會超過51元。在交易及回購完成後，李嘉誠基金會及一致行動人士持股，將由35.99%升至45.02%，以上兩個行動都要在特別股東會表決。明眼人一睇，就知這些行動背後只有一個重點，就是增持股權，所以青冰不會深究個資產究竟係乜喇。
發新股收購資產，再用錢回購股份，看似迂迴，但就避過了一些難題。其他公司向大股東收購資產，通常都係發新股批畀大股東了事，過程都係炒高批股注資三部曲，最後都要過股東會投票一關，小股東好少會留難嘅，但只要你開長實個圖出嚟睇，的確係令人失望，基金及散戶股東應該甚有怨氣，誠哥持約36%股權，即係話要靠64%小股東投票才通過，股價又殘，資產又不是世紀筍嘢，是否夠票通過都成疑問，如果有回購，股東的利益未有攤薄，間接支持股價向上，李澤鉅昨天都話:「股價會靚仔啲」。發完新股再回購，亦可以做到雙重增持之效果，如只有發新股的注資交易，誠哥的持股只會由35.99%增至41.3%，但如果向小股東作回購要約，完成後股權就會由41.3%增至45.02%。
在於誠哥來說，用51元作回購，係非常抵買，按昨天業績顯示的每股NAV，是99.43元，以昨天收市價計，PB只有0.47，以回購價計，PB都係0.51，半價增持真係正喎。而小股東的好處，是可以用51蚊作離場價，以後不用再被長期落後的股價折磨，如果以食息為主，這個資產保證每年派9.1億元，即每股0.2464，長實中期只係派咗0.34元，末期都只有1.46元，相比之下0.2464都不是小數目，而最大的益處就是股價，理論上在投票前都不會太差，股價靚仔，股東投否決的成本才會大，因為否決咗又要跌返落去再磨過。
其實只要注資交易獲通過，誠哥已立不敗之地，如股價升上六、七十蚊，回購要約的51蚊自然收唔到貨，但股價靚仔，皆大歡喜啦，如通過晒之後才不幸插落30蚊，所有股東一定51蚊沽畀你啦，屆時誠哥持股就利益最大化，升至45.02%，即使股價在50蚊浮沉，回購要約收唔齊，餘額都可以繼續以市場日常回購方式，頂住股價。
坊間評論或會將今次單刁同政治扯上關係，青冰的想法就較簡單，長和系在2015年世紀重組，當日長實上市首天的開市價是70元，這五年幾以來派了10.43元股息(包括昨天公佈的)，換言之你當天開市以競價盤70元買入，收埋息持有至今仍然係要輸錢，2015年時的每股NAV係68.17元，最新的數字係99.43元，然後誠哥以51元變相增持及回購，點樣計誠哥都係贏晒，再者，咁豐厚的資產，持股不足四成，都唔係咁安全嘅，還是快些過50%最安心。結論係，無論係誠哥定鉅哥諗到呢招，都要嘆一句，李生，你係好嘢！
--